um félagið
Þegar sýnt þótti, að Surtsey myndi verða varanleg eyja, komu áhugamenn um rannsóknir sér saman um að stofna nefnd og seinna félag, sem stuðlaði að skipulagi og eflingu rannsókna þar.
Í lögum félagsins stendur, að tilgangur þess skuli vera: Að efla rannsóknir í jarðvísindum og líffræði í sambandi við Surtsey og á Íslandi almennt. Félagið sjálft sér ekki um rannsóknarstörf.
Surtseyjarfélagið hefur gefið út skýrslur með niðurstöðum vísindastarfa, sem þar hafa farið fram. Það hefur tvívegis staðið fyrir byggingu rannsóknarhúss í eynni og einnig hefur félagið ráðist í að láta gera þyrlupall á Surtsey. Surtseyjarfélagið hefur fengið fjárframlög til rekstursins frá ýmsum aðilum og í mörg undanfarin ár verið styrkt af íslenska ríkinu.
Rannsóknavinnan í Surtsey hefur farið fram á ýmsum stofnunum, einkum Náttúrufræðistofnun (NATT), Háskóla Íslands (HÍ), Landbúnaðarháskóla Íslands (LBHÍ), Íslenskum Orkurannsóknum (ÍSOR), Hafrannsóknastofnun (HAFRÓ), Veðurstofu Íslands (VÍ) og ýmsum fleiri innlendum og mörgum erlendum stofnunum. Það voru Landmælingar Íslands og síðar Loftmyndir ehf. sem lengi tóku allar loftmyndir af Surtsey, en hin síðari ár hafa þær verið teknar annað hvert ár með flygildum (dróna) í jarðfræðileiðöngrum félagsins.
Surtseyjarfélagið hefur haft aðsetur sitt hjá Náttúrufræðistofnun og er félagið stofnuninni þakklátt fyrir þá greiðasemi sem hún hefur sýnt félaginu.
Formaður stjórnar Surtseyjarfélagsins er Hólmfríður Sigurðardóttir, umhverfisgyðja Orkuveitu Reykjavíkur. Aðrir í stjórn eru Olga Kolbrún Vilmundardóttir (NATT, varaformaður), Bjarni Diðrik Sigurðsson (LBHÍ, gjaldkeri), Lilja Gunnarsdóttir (HAFRÓ, ritari), Magnús Tumi Guðmundsson (HÍ, meðstjórnandi), Viggó Þór Marteinsson (MATÍS, meðstjórnandi) og Birgir Vilhelm Óskarsson (NATT, meðstjórnandi).
Varamenn í stjórn: Sigurður Sveinn Jónsson (ÍSOR), Guðrún Nína Petersen (VÍ) og Gunnar Viðar Gunnarsson (LBHÍ, viðhaldsmeistari Surtseyjarfélagsins).
Lög Surtseyjarfélagsins má nálgast HÉR